Vorum að keppa á opna íþróttamótinu á Gaddstaðaflötum um helgina, við skráðum fjóra hesta, Ása keppti á Hvata í 5 gangi og komst í fimmta sætið.

Bergur var skráður með Vakar í tölti og fjórgangi en náði ekki heldur að keppa núna því Vakar er engan veginn búinn að jafna sig á múkkinu.

Það er reyndar að há fleiri hestar hjá okkur,  þrálát leiðinda sýking sem gerir þá bólgna og auma í löppunum. Ég keppti á Kraflari í tölti og fjórgangi og á Háfeta í fjórgangi.

Háfeti var að mæta í fyrsta sinn í keppni, en hann er frá Leirulæk í Borgarfirði.

Fór ég með hann í þetta sinn til að ná einkunn á hann og fór hann í 7,17 í þetta sinn og varð í annað sæti eftir forkeppnina á eftir Kraflari. Háfeti er vonandi framtíðar keppnishestur hjá mér, en hann á mikið inni og er hestur sem ég er virkilega hrifin af.

Kraflar stóð sig með sóma þessa helgina, eins og síðustu helgi. Við ákváðum strax að keyra á hann og láta slag standa til að sjá hverning hann myndi standa sig undir miklu álagi. Ég komst að því að hann er nægilega sterkur, hann hefur staðið af sér tvö úrslit í röð  með stuttu millibili, tvær helgar í röð og það er ekkert lítið sem hann tekur á, sérstaklega á hægu tölti, en hann er sterkur, úthaldsgóður og fljótur að afmæðast þó að ég finni auðvitað fyrir því að hann þreytist.

 Hann er níu vetra í dag en ég hef þjálfað hann meira og minna síðan hann var fimm vetra.

Allskonar slys og veikindi hafa síðan orðið til þess að ég hef lítið sem ekkert keppt á honum, til að gera langa sögu stutta ætla ég að orða það þannig að við

Kraflar höfum engan veginn haft heppnina með okkur til þessa.

Hins vegar hafa alltaf nokkrir aðilar stappað í mig stálið og fyrstan ætla ég að nefna Atla Guðmundsson sem hefur marg sagt mér að gefast ekki upp, að hann sé sérstakur.

M.a svona setningar halda manni gangandi og  ótrúlega  ljúft að uppskera eftir margra ára markvissa þjálfun.

 Ég er búin að fá hellings veganesti og geri mér fulla grein fyrir því að ég verð að bæta ýmislegt og það verður tekið föstum tökum.

Núna fengum við 7, 59 í 4 gangi forkeppni og 7, 63 í úrslitum og fyrsta sætið.

Í tölti fengum við 7, 83 í forkeppni og  8,39 í úrslitum og annað sætið. Svo unnum við líka tvíkeppnina.

                Myndir: Gangmyllan