Hér eru nokkrar myndir af henni Hátign, hún er á fimmta vetur, móðir hennar er Þerna  hún er undan Stíg frá Kjartansstöðum en móðir Þernu var Sylgja.Sylgja átti aðeins Þernu áður en hún var seld til Þýskalands, langaamma Sylgju var Ljónslöpp 1817 formóðir allra Ketilsstaðahrossana. Faðir hennar er Dalvar frá Auðsholtshjáleigu og Föðurafi er Keilir frá Miðsitju.  Svo eru Garðabæjarhrossin þarna bakvið líka, í gegnum Dalvar, en hann er undan Gyllingu, sem var undan Gloríu frá Hafnarfirði sem aftur var undan Gnótt frá Brautarholti.

Hátign er stór og myndarleg og efnileg alhliðahryssa.

                Myndir: Gangmyllan

Hér koma nokkrar myndir af Védísi, hún er undan Vöku frá Hellubæ og Álfasteini frá Selfossi. Hún verður fimm vetra í vor. Móðir hennar Vaka er undan Golu frá Hellubæ sem er undan Gáska frá Hofsstöðum og faðir hennar er Feykir frá Hafsteinsstöðum.  Langalangafi hennar  er Kulur frá Eyrarbakka. Védís er í okkar eigu en er úr ræktun Gíslinu Jensdóttur á Hellubæ.

Védís er mjög efnileg klárhryssa  sem við væntums mikils af þó hún hafi farið frekar illa út út byggingadóm í fyrra, fékk aðeins 7,72 þar af aðeins 6,5 fyrir höfuð sem okkur fannst helviti hart.  Hún hlaut einhvern veginn alltaf lægri töluna. En hvað með það, inn í ræktunina fer hún. 

 

 

 

 

 

Myndir: Gangmyllan

Þetta er hún Ylva frá Efri Gegnisholum, hún er á fimmta vetur, undan Syrpu og Erni frá Efri-Gegnishólum. Hún er mjög efnileg og hreyfingamikil alhliðahryssa. Eigendur hennar eru nágrannar okkar Bragi og Hildur í Efri Gegnishólum. Móðir hennar Syrpa er undan Stíg frá Kjartansstöðum og faðir hennar Örn er undan Aron frá Strandarhöfða, þannig að Náttfari frá Ytra Dalsgerði er tvöfaldur á bakvið hana.

Knapi: Elin Holst

            Myndir: Gangmyllan

 

Þessar myndir eru af henni Reisn frá Ketilsstöðum en hún er undan henni Brá Orradóttir og Leikni frá Vakursstöðum. Þegar veðrið var sem best hérna um daginn tókum við nokkrar myndir af ungu hryssunum sem eru hérna hjá okkur og ætlum við að birta nokkrar myndir næstu daga.

Reisn er á fimmta vetur er mikið hestefi, efnileg klárhryssa þæg og þjál.

        Myndir: Gangmyllan

Myndir. Gangmyllan

Þetta er hann Gáski frá Reykjavík, hann er tiu vetra gamall. Hann er undan Gáskadótturinni Bylgju frá Reykjavík og Suðra frá Holtsmúla. Ég prófaði hann í fyrravor og fékk hann til þjálfunnar í november, en hann var  þjálfaður af Ragnari Hinrikssyni fram að því. Eitthvað litið hefur verið keppt á honum fram að þessu en vonandi verður hægt að bæta úr því í vor. Allavega ætla ég að halda því fram að hér er mikið fjórgangsefni á ferð.

Magni og Hlébarði sem við seldum í haust voru að fara í sína fyrstu keppni í Swiss, en það var keppni á ís. Magni og Lisa lentu í öðru sæti í fjórgangi  og Mara komst í B úrslit í sömu grein á Hlébarða en reið ekki úrslitin.

 Magni er undan Musku frá Stangarholti og Leikni frá Vakusstöðum og Hlébarði er undan Ljónslöpp frá Ketilsstöðum og Aron frá Strandarhöfða.

 Birti nokkrar myndir sem þær systur sendu okkur um leið og við óskum þeim innilega til hamingju með árangurinn. 

Lisa og Magni

Mara og Hlébarði

Var að koma frá Bandarikjunum eftir nokkra daga veru á Flying C, búgarði þeirra Ástu  og Will Covert í Californiu. Menn voru vel riðandi enda þónokkrir af  þeirra hestum  þekktir gæðingar á Íslandi áður.

Stefnt er með a.m.k þrjá þeirra á HM í sumar og miðað við ástand þeirra núna lítur það bara mjög vel út. Húni frá Torfunesi var á sinum tima Íslandsmeistari í slaktaumatölti og stefnt er með hann í þá grein á HM og miðað við stöðu  hans núna er hann til alls líklegur. Dynjandi frá Dalvík  sem gerði garðinn frægann á síðasta  HM var í feikna stuði og ótrúlega ferskur. 

Ásta og Dynjandi frá Dalvik

Ann Marie og Húni Frá Torfunesi

Eileen og Drift frá Ytra Dalsgerði

Rachel og Kaliber frá Lækjarbotnum

Lúsy og Andri frá Sólbrekku

Myndir: Ásta Bjarnadóttir Covert

 

Eftir marga daga með leiðindaveðri, úrkomu og roki og færið mjög þungt og leiðinlegt var bjart og fallegt  veður í morgun. Smá frost, logn og bjart yfir. Þá vorum við ekki lengi að nyta tækifærið og riða úti. Við smelltum nokkrum af Álffinni. 

 

Vegna þess að mikið er spurt um hann Álffinn okkar hef ég sett hann inn á heimasíðuna undir stóðhesta, en venjulega höfum við beðið með það þangað til að búið er að dæma þá.

Fyrir þá sem ekki vita er Álffinnur á fjórða vetri undan Orra frá Þúfu og Álfadísi frá Selfossi, hann er brúnskjóttur að lit og albróðir Álfs frá Selfossi, sem líklega skyrir væntingarnar sem gerðar eru til hans.

Tveggja vetra gamalan notuðum við hann á nær allar hryssurnar okkar og eigum við þrettán folöld undan honum en alls eru til fimmtán folöld. Eins og er eigumvið til myndir af ellefu þeirra en ekki er óliklegt að við finnum fleiri.

Mikill áhugi er á að nota hann og er um að gera fyrir þá sem áhúga hafa á því að skoða myndirnar af honum og afkvæmum hans.

Af Álffinnni er mikið gott að frétta, hann temst vel, er alhliðahestur með vel aðskildar og góðar gangtegundir og frábært geðslag og vilja. Hann stenst að okkar mati fyllilega þær væntingar sem við gerum til hans.

Í sumar var hann mikið notaður og er von á nær fimmtíu folöldum undan honum á næsta ári.

Í vor verður hann í húsnotkun hér hjá okkur og í sumar verður hann í Landssveitinni í umsjón þeirra Svanhildar og Magnúsar hjá Úrvalshestum. 

Þá er búin ein greinin enn í meistaradeildinni og Bergur tók þátt á Vakari, gerði að mestu leyti vel enn smá hnökrar á hægu tölti gerðu út um  úrslita sæti í þetta sinn. Aldrei er heldur nein bót í máli að vera fyrstur inn á, en svona fór þetta núna, 6,83 og 11 sætið varð að duga í þetta sinn.

Að vanda var gaman og spennandi að horfa á, hestarnir flóttir og góðir og dómgæslan í betri kantinum.

Mynd: Fjölnir Þorgeirsson

Í dag var frábært veður, minnti helst á vorveður og eins og vanalega þegar gott veður er koma margir í heimsókn. Þar á meðal kom Guðbrandur Stigur Ágústsson, hann á hjá okkur eina hryssu á fjórða vetri, en það er hún Álöf frá Ketilsstöðum undan Hefð frá sama bæ og Álfi frá Selfossi. Ég notaði tækifærið og smellti einni mynd af þeim félögum með hryssum sinum. En þær eru sammæðra og undan þeim hálfbræðrum Álfi og Álfasteini og fannst okkur við hæfi að stilla þeim upp undir myndinni af ömmu sinni henni Álfadísi frá Selfossi. 

 

 

 

 

 

 

 

 

 

Bergur með Drift og Guðbrandur Stigur með Álöfu.

Eins og þið kanski hafið orðið vör við höfum við heldur betur tekið okkur á í markaðsmálum, höfum haldið okkur frammi og auglýst  ræktunina og starfsemina töluvert mikið. Það er hann Guðbrandur Stígur Ágústsson og hans fólk sem stýrir þessu hjá okkur, enda er hann  ákaflega hugmyndaríkur og afkastamikill, þannig að það er mjög gaman að taka þátt í þessu með honum. Nú síðast var það bændablaðið og kom hann og tók nokkrar myndir af okkur,  með það í huga. Það þarf oft að taka töluvert margar myndir til að ná einni góðri. Hér birti ég í gamni, nokkrar sem voru teknar í röð, en Bergur tók smá sjów svona rétt til að ná upp réttri stemningu. 

Það er mjög fallegt úti þessa daganna, snjór, hæfilega kalt og sólin skín. Snjórinn liggur eins og teppi yfir öllu og gerir vegina að fjaðrandi og skemmtilegum reiðgötum.  Um helgina voru hestarnir lengi úti og léku sér mikið.

Við notuðum tækifærið og tókum nokkrar myndir.

 

 

Fálmar á fjórða, undan Þernu og Sveini Hervari

Álffinnur á fjórða, undan Álfadísi og Orra

Jónatan á fjórða, undan Musku og Natan

Frami á fjórða, undan Framkvæmd og Sveini Hervari

 

Bergur var að keppa á Vakari á Ingólfhvoli á fyrsta móti hjá meistaradeildinni, en fyrsta mótið var 4 gangur, en Bergur er í Toppreiter/Ármót/66° norður  liðinu. Aldrei þessu vant tók ég ekki með mér myndavélina  og setti þar af leiðandi ekki neina frétt. En þá var Fjölnir Þorgeirsson svo elskulegur að leyfa okkur að nota sínar myndir.

Þess vegna, og betra seint en aldrei, set ég stutta frétt. Þeir foru beint í A úrslit, með einkunnina 7,07 og héldu sínu sæti í úrslitum, enduðu í fimmta sætið með einkunnina 7,30. Okkur finnst það bara vera góður árangur á lítið þekktum hesti að ná þessu í þessum félagsskap, enda margir af bestu fjórgöngurum landsins að taka þátt.

 

Myndir: Fjölnir Þorgeirsson

  

Nú er enn og aftur nýafstaðiað námskeið með Julio Borba og að vanda tókst það mjög vel. Hann var hjá okkur í fimm daga og er alltaf mikill áhugi og komast færri að en vilja. Enda ótrúleg þekking sem hann býr yfir og alltaf jafn gaman að sjá hvað hann beitir mörgum aðferðum til að ná árangri. Maðurinn er með arnaraugu og ræðst í verkefnin með mikilli ákveðni og elju.

Á þessum dögum féllu að vanda mörg gullkorn og eitt af þvi fyndnara var þegar hann spurði ákveðinn knapa sem nýbúinn var að leysa verkefnið sitt hvort að hesturin væri ekki orðinn góður, knapin játaði því og þá sagði hann um hæl, brostu. Svo sagði hann að markmiðið væri brosandi knapi á alvarlegum hesti en aftur amóti væri það verra með alvarlegum knapa á brosandi hesti !!! 

það er fróðlegt að fylgjast með	Hulda með Seif frá Prestbakka
Heimir og Muska frá Hofdölum	Olil, Ellen Thamdrup og Freyja
Hverning svipur er nú þetta?	Freyja og Styrkur
Karen Lindal Marteinsdóttir	Verið að fara yfir stöðuna, Julio og Siggi
Hulda, Jakob og Julio	Liðstjóri Svía
Karen og Ása	Bergur , Gunnar og Einar, eitthvað að krúnka