Reiðkennsla er eitthvað sem ég hef alltaf haft áhuga á og notið, Ég hef stundað reiðkennslu frá 1990, byrjaði í Búðardal, á Þingeyri og Bolungarvík. Ég kenndi einnig í Noregi, í Forsand, Haugesund og Oslo. Reiðkennsluhluti vinnunnar fór svo vaxandi og áður en ég vissi kenndi ég á fjölmörgum stöðum.

Fyrsta reiðkennaraprófið skilaði mér reiðkennararéttindum C frá FT árið 1996. Seinna tók ég annað próf fyrir reiðkennararéttindi B frá FT, 1998.

Ég nýt þess að kenna, hef lært af mínum nemendum og lagt áherslu á að ferðast og kanna eins og kostur er og fylgjast með því sem er að gerast í hestaheiminum. Til dæmis hef ég kennt í Noregi, Svíþjóð, Danmörku, Finnlandi, Bretlandi, Þýskalandi, Austurríki, Sviss, Hollandi og Belgíu en haustið 2007 bættust Bandaríkin við.

Í dag kenni ég einkatíma í Sviss, Þýskalandi og skandinavíu auk bandaríkjanna.

Á íslandi kenni ég í einkatímum auk helgarnámskeiða fyrir einkahópa. Þetta er krefjandi vinna en gefandi og skemmtileg. Kennsla verður sennilega alltaf stór partur af mínu lífi, það er alltaf góð tilfinning þegar nemandi nær tökum á verkefninu. Í framtíðinni er ætlunin að færa kennsluna heim og bjóða jafnframt upp á einkatíma á okkar hestum. Hver vill ekki fara í einkatíma á hesti sem er með 9,5 fyrir skeið eða yfir 7,5 í fjórgangi 😊

Ég hef unnið sem þjálfari fyrir íslenska landsliðið á norðurlandamótum og heimsmeistaramótum auk þess að þjálfa sænska landsliðið og norska landsliðið. Í dag er ég þjálfari og ráðgjafi fyrir þýska landsliðið.