Við erum komin með lið í meistaradeildinni, sem hefst 31 janúar. Við sóttum um í fyrra líka, þá komumst við ekki að en nú tókst það. Þetta verður spennandi og gaman og mikil breyting fyrir okkur. Bergur hefur tekið þátt tvisvar en ég hef aldrei tekið þátt, ef frá er dregið að ég var varaknapi í liði Lýsis í hitt í fyrra. Þá var markmiðið að ég ætti að taka þátt í gæðingafimi. Kraflar var síðan veikur þanning að ekki gat ég sinnt verkefninu sen skyldi og endaði það með að ég tók þátt í aðeins einni grein, slaktaumatölti á lánshesti. Mér hefur oft verið boðið að taka þátt, en hef alltaf hafnað því á þeim forsendum að mig hefur ekki langað að hefja keppnistímabilið svona snemma og auðvitað er mun erfiðara að sinna reiðkennslunni erlendis samhliða þáttöku í meistaradeildinni. Aftur á móti er auðvitað frábært að fá lengra keppnistímabil í íþróttakeppninni því flestum íþróttamótum er hrúgað saman í maímánuði að undanskildu íslandsmótinu og svo auðvitað íþróttamótunum á haustinu sem að mínu mati minna meira á firmakeppni í íþróttasniði frekar en íþróttakeppni. En sem sagt við erum með lið og með okkur höfum við fengið okkar fólk og vini okkar þau Daníel Jónsson og Önnu Valdimarsdóttir en þau vorum við með í sigtinu í fyrra líka ásamt Jakobi Sigurðssyni en hann er í öðru liði. Anna hefur m.a. margoft verið í íslenska landsliðinu á heimsmeistara og norðurlandamótum með toppárangur og Daníel tók þátt á meistaradeildinni með góðum árangri fyrir nokkum árum, ásamt því að vera íslandsmeistari í fimmgangi og í þriðja sæti í fimmmgangi á heimsmeistaramótinu sama árið og svo margt margt fleira.

Myndin af Daníeli og Bergi var tekin í haust af Sigurði Sigmundssyni þegar þeir félagar voru að dæma saman á folaldasýningu í haust.  Myndin af okkur Önnu, veit ég ekki hver tók en hún er síðan 2007 þegar við vorum saman í íslenska landsliðinu í Hollandi. Ég er ekki viss um að hún vinkona mín sé sátt við þessa mynd en hún er svo stríðin að ég læt hana bara vaða.

• Prev
• Next