Bergur Jónsson fæddist á Ketilsstöðum 1960 og er næst elstur fjögurra systkina. Hann hafði strax mikinn áhuga á hestum og fór að taka þátt í útreiðum, tamningum og þjálfun um leið og hann hafði aldur til. Hrossaræktin á Ketilsstöðum var í heldur smáum stíl lengi vel enda mjög hrossafátt svæði. Árið 1968 breyttist þetta hinsvegar þegar hestamannafélagið Freyfaxi breytti stefnu sinni og hóf að leigja mjög góða stóðhesta.

Fyrstur var Sörli 653 frá Sauðarkróki og árið eftir fæddust á Ketilsstöðum stóðhesturinn Blakkur og hryssan Kvika. Kvika skildi ekkert eftir sig en Blakkur var afi Hugmyndar sem var aðal hryssa Bergs lengi vel. Eins og hjá öðrum börnum sem ólust upp í sveit var vinnan við bústörf mikil og var Bergur snemma fullgildur í heyskap og sat hann á vélunum dagana langa. Útreiðar og hestamennska var eitthvað sem stundað var þegar hlé var gert frá öðrum störfum. Kennslan sem Bergur fékk í reiðmennsku var ekki mikil enda tiðkaðist það ekki i þá daga, heldur skreið maður á bak og reið bara einhvernvegin – oftast hnakklaust. Fyrsti hestur Bergs hét Neisti og var einhæfur brokkari sem var aldrei gangsettur, enda reið maður eins og indjáni og var ég að leika mér að þvi að láta hann stökkva yfir hliðinn frekar en að opna þau, segir Bergur.

Veturinn sem Bergur var á þrettánda ári, 1973, kom Ragnar Hinriksson austur að temja og þjálfa fyrir fjórðungsmótið og faðir hans, Jón Bergsson, setti hesta í tamningu til hans. Um vorið þegar fór að grænka var gerð aðstaða heima á Ketilsstöðum og voru þeir Ragnar og Atli heitinn Vilbergsson þar um sumarið að þjálfa fyrir fjórðungsmótið. Segir Bergur að það hafi verið ofboðslega gaman enda reið hann eins mikið út með þeim og hann gat og létu þeir hann á bak mikið af ólíkum hrossum.

Bergur fékk líka að prófa nokkrar 1 verðlauna hryssur þar á meðal Elísu frá Sandfelli sem Ragnar eignaðist síðar og fór í mjög háan dóm seinna.

"Á fjórðungsmótinu um sumarið var yfirlitssýning með öðrum hætti en í seinni tíð og veit ég ekki einu sinni hvort dómur var opinn en ég fékk alla vega að ríða einhverjum  hrossum og ég reikna fastlega með því að þeir hafa ekki ætlast til að þau myndu hækka hjá mér. Þetta var alveg ofsalega dýrmætt að fá að lenda inn i svona ævintyri fyrir ungan strák að vera með svona snillingum sem breytti fyrir mér allri hugsun og ásýnd á hestamennskuna." segir Bergur.

Þannig að 12 ára gamall fékk hann að byrja að sýna hross á kynbótasýningum, svo leið nokkur ár, enda kynbótadómar ekki í gangi nema fyrir fjórðungs og landsmót. Þegar hann var 16 ára, í tíunda bekk tamdi hann og þjálfaði sjö hryssur með skólanum og sýndi um vorið i  kynbótadómi. Bergur rekur í minnið að þær hafi komið betur út en skólinn án þess að þær hafi endilega allar farið mjög hátt. Þær fóru allar inn á fjórðungsmót enda voru það engar smá kanonur. Allt hryssur sem hafa markað djúp spor í sögu hrossaræktarinnar á Ketilsstöðum. Þar var Ör, móðir Hugmyndar, Fála móðir Mána, Snekkja móðir Vakningar og Ljónslappar og Kengála amma Framtíðar.

Þarna var hans stefna mótuð. Ekki var haldið áfram i skóla og næsta vetur snéri hann sér að tamningum og þjálfun sem hann hefur gert alfarið siðan. Fyrstu árin tamdi Bergur fyrir hina og þessa en haustið 1979 var byggt hesthús á Ketilsstöðum og tamdi hann og þjálfaði þar veturinn 1980. Um sumarið var fjórðungsmót og var það fyrsta stóra mótið hjá Bergi. Þar syndi hann fjöldann allan af kynbótahrossum og gæðingum. Var hann með efstu fimm vetra merina, efsta stóðhestinn og þriðju fjögurra vetra hryssuna. Einnig var hann með hross í úrslitum í A og B flokki.

Veturinn eftir var Bergur að temja hjá Sigurði Haraldssyni í Kirkjubæ og veturinn þar á eftir í Skagafirði hjá Hrossaræktarsambandinu. Vinnan fólst í að afkvæmaprófa Júpíter frá Reykjum og Óðinn frá Sauðarkróki. Þarna voru tryppin tamin í rúma tvo mánuði og sýnd síðan í kynbótadómi. Þegar Bergur lagði til og fór fram á að eitt tryppanna yrði ekki sýnt sagði Sveinn á Sauðarkróki honum að hann gæti tekið pokann sinn og einhver annar yrði fenginn til að sýna hrossin. Þarna vann Bergur það fræga afrek að sýna hross sem fékk  slétta 6,00 fyrir hæfileika. Með písk í báðum höndum náði hann 5.0 fyrir þrjár gangtegundir, tölt, skeið og stökk.

Eftir þessa dvöl í Skagafirði sinnti Bergur nánast eingöngu tamningum og þjálfun á austurlandi. Rak hann þar tamningastöð og þá alltaf með einn eða tvo í vinnu. Veturinn 1984 tók Bergur svo tamningapróf og 1986 þjálfarapróf hjá félagi tamningamanna. Bergur tók reiðkennararéttindi C á reiðkennaranámskeiði í Hólaskóla 1992 og B réttindi FT í reiðkennslu í desember 1998. 1993 aflaði hann sér gæðingadómararéttindi og svo  landsdómararéttindi 1994. Fyrsta landsmót Bergs var 1978 og hefur hann sýnt hross á öllum landsmótum síðan að mestu leyti kynbótahross en þó hefur hann riðið til úrslita í A flokki á þremur landsmótum.

• Prev