Þegar síðsumarsýning er afstaðin getum við ekki verið annað en ánægð. Við fórum með 2 hross í kynbótadóm, endursýningu, þau Sylgju og Goða frá Ketilsstöðum og hlutu þau bæði fyrstu verðlaun. Sylgja er 6 vetra klárhryssa undan Spes frá Ketilsstöðum og Natan frá sama bæ, hún hlaut í aðaleinkunn 8,05, þar á meðal 9 fyrir stökk, vilja, fegurð og hægt stökk. Sylgja er því 10. hrossið af 10 sem hlýtur 1.verðlaun, undan Natan árið 2014, ekki slæmt á hjá Natani og alveg hrikalegt að vera búin að missa hann, svona langt fyrir aldur fram. Móðir Sylgju er Spes frá Ketilsstöðum sem er með 8,20 í aðaleinkunn, klárhryssa með 9,0 fyrir flest öll atriði nema 9,5 fyrir hægt stökk og stökk. Sylgja er hennar elsta afkvæmi og fyrst til að koma í kynbótadóm.
Við erum lika mjög ánægð með að Goði, 4 vetra, sem var sýndur í bjartsýniskasti hér í vor og hlaut 7.71, hækkaði sig helling og endaði með 8,08 í aðaleinkunn, hlaut m.a  9 fyrir bæði tölt og vilja .Við teljum að hér sé mikið klárhestefni á ferð, myndarlegur, geðgóður, duglegur og hreyfingafallegur foli. Faðir Goða er Álffinnur frá Syðri Gegnishólum. Skemmtileg byrjun hjá Álffinni, kominn með tvö afkvæmi í 1.verðlaun úr fyrsta árgangi og sérstakt að bæði afkvæmin eru sýnd sem klárhross. Til gamans má geta að Natan og Goði eiga sömu móður, Vænting frá Ketilsstöðum.

Vænting, móðir Goða er undan Hugmynd frá Ketilsstöðum og af þessu kyni eru nánast eingöngu vökur hross, með enga smá dóma fyrir skeið, flest frá 8,5 og upp í tvær tíur fyrir skeið, en sjálf er Vænting með 8.5 fyrir skeið. Þótt Álffinnur sé flugvakur, er hann auðvitað með tvö alsystkini sem eru sýnd sem klárhross, þau Álfur og Álfhildur, þar liggur kannski skýringin. Ef við skoðum þetta nána eru t.d. Frami frá Ketilsstöðum og Goði undan systrum, þeim Framkvæmd og Væntingu, Hugmyndardætrum. Framkvæmd undan Hrafn frá Holtsmúla og Vænting undan Toppi frá Eyjólfsstöðum, Hrafnssyni. Svo eru feður þeirra Frama og Goða, Sveinn Hervar og Álffinnur báðir undan Orra og Sveinn Hervar mikilll klárhestafaðir. Þannig að þeir Frami og Goði eru heilmikið skyldir, enda eru þeir töluvert líkir líka. Frami undan klárhesti og Goði undan alhliðahesti með a.m.k. tvö klárhesta alsystkini.

• Prev
• Next