Var að fá þessar skemmtilegu fréttir af Hvata, en hann tók þátt í sinni fyrstu keppni um helgina með nýja
eiganda sínum henni Eileen Ma.

Ásta Covert skrifaði okkur eftirfarandi:

  "Það gekk alveg svakalega vel hjá Eileen með Hvata um helgina en þau voru í Pleasure Tölt bara svona til
að prófa sig áfram og líka af því að Eileen hafði bara farið á hann 4-5 sinnum fyrir keppnina. Þannig að það var
frjáls ferð á tölti og snúið við og frjáls ferð á tölti.

Hún fékk 6.20 í forkeppninni og í úrslitunum fékk hún 6 hjá öllum dómurunum upp á vinstri og svo þegar
hún reið honum upp á hægri reið hún aðeins hraðar og hann var rosalega flottur hjá henni og hún fékk 7.0 hjá
3 dómurum og 6.5 hjá tveim og aðaleinkun uppá 6.42" T8F - Pleasure Tölt - A-Final 

 01  007 Eileen Ma / Hvati frá Ketilsstöðum 6.4

                  LeftHand    6.0-6.0-6.0-6.0-6.0  6.00                 

                RightHand    7.0-7.0-7.0-6.5-6.5  6.83

Héðan hefur ekki verið mikið að frétta þessa daganna en tamningar ganga vel ogvið erum að snudda í hinu og þessu. Undanfarið hef ég verið að uppfæra heimasíðuna og held ég að því sé að mestu leyti lokið í bili.

Erum búin að taka reiðhöllina í gegn, undirlagið var farið að gefa sig þannig að við mokuðum skeljasandinum út, bættum við og sléttuðum millilagið og settum inn nýjan skeljasand.

Veggirnir voru skrúbbaðir og skolaðir og fótafjölin lökkuð, enda var hún orðin ansi mött.  Þannig að nú er reiðhöllin alveg eins og þegar hún var ný.

Það eru orðið langt síðan fréttir hafa borist frá okkur enda höfum við verið netssambandslaus í nær mánuð og höfum við fengið mjög óljósar skýringar hvers vegna, óþolandi en svona er þetta bara.

Haustið er gengið í garð og það þýðir fyrir okkur að frumtamningar eru hafnar, hryssurnar eru að verða mánaðar tamdar og stóðhestarnir eitthvað styttra. Geldingarnir, bíða fram á næsta haust.

Nú koma til tamningar tólf hryssur og fimm stóðhestar, en þau eru öll á þriðja vetur. Það er alltaf jafn spennandi að byrja á tryppunum og reyna að átta sig á hestefninu í hverjum og einum einstaklingi.

Nú kemur til tamningar fyrsta afkvæmið hennar Spes, rauð hryssa undan Natan.  Spes var feiknalega mikil sporttýpa, léttbyggð og hágeng, enda með nánast eintómar níur í hæfileikum nema 9,5 fyrir hægt stökk og stökk. Svo erum við að fara að temja fyrstu afkvæmin hans Gandálfs, m.a rauðan fola undan Framkvæmd og rauðtvístjörnótta hryssu undan Vakningu.

Síðustu afkvæmi mæðgnanna Muggu og Musku eru komin inn, en Mugga átti sitt síðasta folald 26 vetra gömul og er á ellilaunum í fullu fjöri í stóðinu á Ketilsstöðum 29 vetra gömul. Muska drapst hinsvegar langt fyrir aldur fram, aðeins fimmtán vetra gömul. Undan Muggu er rauð hryssa undan Ljóna en undan Musku er grár foli undan Álfasteini, hann heitir Jörmuni, en hann var kallaður aðtoðarmaðurinn vegna þess að þegar hann var folald var móðir hans hjá Kraflari og Jörmuna, sem var fæddur í apríl, fannst mikið skemmtilegra að vera með Kraflari en móður sinni og sást iðulega til Kraflars hlaupandi um girðinguna með folaldið sér við hlið eins og ekkert væri sjálfsagðara.

Svo er brún hryssa undan Framtíð og móálótt undan Brá, en þær eru báðar undan Álfasteini. Þerna og Mylla eru með Leiknirsdætur, dóttir Þernu er rauðstjörnótt en dóttir Myllu er jörp. Svo er jörp hryssa undan Ljónslöpp og Gaum og tveir brúnstjörnóttir Gaumssynir undan Væntingu og Júlíu.

Grá hryssa er undan Gráhildi og Keili og undan Álfadísi eru brún Orradóttir. Undan Oddrúnu er Glottasonur og er hann rauðglófextur, blesóttur, sokkóttur og undan Hlín og Gusti er grá hryssa.

Það má segja að nær undantekningalaust fara tamnigar vel af stað og hryssurnar allar vel reiðfærar en hestarnir eru komnir eitthvað skemur enda var byrjað á aðra viku seinna á þeim.

 Það var víst ekki búið að skrifa um síðsumarssýninguna á Hellu, en þar sýndum við fimm hross, tvær fjögurra vetra hryssur í fyrsta dóm og þrjú endursýnd. Fjögurra vetra hryssurnar voru þær Ösp frá Ketilsstöðum og Gersemi frá Syðri Gegnishólum. 

Ösp er dóttír Ör frá Ketilsstöðum, sem er dóttir Framkvæmdar frá Ketilsstöðum  og Kjarvals frá Sauðárkróki. Faðir hennar er heiursverðlaunahesturinn Gustur  frá Hóli.  Ösp hlaut  8,04 fyrir sköpulag, 7,35 fyrir hæfileika og samtals 7, 62. Hún er viljug og ganghrein alhliða hryssa, fotaburður er í meðallagi og hennar aðall er klárlega skeið. Skeiðið var hins vegar engan veginn eins og við gerðum okkur vonir um og hlaut hún aðeins 7,5 fyrir þann eiginleika en hefði getað verið 9,0 ef vel hefði tekist til. Við vitum það svo sem að við rennum oft blint í sjóinn þegar við synum fjögurra vetra hross, maður veit auðvitað aldrei hverning þaug bregðast við nýjum aðstæðum.

Það getur samt verið  hrikalega gaman að vera með og sýna fjögurra vetra hross og held ég að við myndum sakna þess mikið ef að sýningum á þeim aldursflokki yrðu lagðar niður.

Gersemi sem einnig er fjögurra vetra hlaut  8,03 fyrir sköpulag, 7,80 hæfileikar og samtals 7,90. Hún er dóttir Gráhildar frá Selfossi og er elsta afkvæmi hennar, móðir Gráhildar er Muska frá Stangarholti og faðir er Randver frá Nýjabæ. Gráhildur var sýnd fjögurra og fimm vetra gömul, fjögra vetra hlaut hún 7,85 og fimm vetra 8,12, þ.a 9,0 fyrir brokk,tölt fegurð í reið og vilji. Faðir hennar er Leiknir frá Vakursstöðum, sem er með 8,28 í aðaleinkunn og er búinn að standa sig vel á keppnisvellinum. 

Svo sýndum við tvær fimm vetra hryssur, þær Hátign og Bygju frá Ketilsstöðum en þær eru báðar sýndar áður en ekki tekist sem skyldi. Hátign var ekki að meika það núna frekar en hin daginn og endaði í sinn lægsta dóm 7,68, d..............vitleysa, næst verðum við að gera betur, hún getur svo vel farið í góðan dóm, en svona er þetta bara stundum. Hátign er dóttir Þernu frá Ketilsstöðum og Dalvars frá Auðsholtshjáleigu.

Loksins tókst þetta sæmilega með Bylgju, en hún er dóttir heiðursverðlaunahryssurnar Vakningar frá Ketilsstöðum og Álfasteins frá Selfossi sem gerir hana að alsystir Brimnis. Eins og Bylgja er skemmtileg og góð hryssa hefur ymislegt gengið á afturfótunum, eins og í fyrra t.d, varð ég að stiga af baki, akkurat þegar ég var að fara í braut vegna þess að hún steig á grjot í upphitun og heltist og í ár hefur hún tekið upp á því að tölta á útopnu þegar hún átti að skeiða, virðist hún fipast í brautinni, en núna tókst þetta sæmilega og hlaut hún 8,0 fyrir skeið. Hún hlaut 8,08 fyrir sköpulag, 8,13 fyrir hæfileika og samtals 8,11.  þ.a 8,5 fyrir hægt tölt, tölt og vilja, þessi einkunn er samt svo langt frá getu hennar að við höfum ákveðið að gefa henni annað ár í þjálfun.

Við sýndum  einn stóðhest, Amazon frá Ketilsstöðum en hann var með 7,93 fjögurra vetra gamall, lækkaði svo aðeins í vor niður í 7,88 og hækkaði sig svo í 7,95 núna og í þetta sinn var Daniel Jónsson í hnakknum. Sýningin tókst mjög vel að mörgu leyti  og hlaut hann m.a 8,5 fyrir hægt tölt, tölt, stökk og vilja,en því miður lækkaði hann um heilan á skeiði og annað eins á feti, sem ekki náðist að hækka í yfirlitinu. Amazon er sonur Orku frá Gautavík og Natans frá Ketilsstöðum, en undan Orku er einnig Álfasteinssonurinn Almar sem er árinu eldri en Amazon og hlaut hann 8,31 í aðaleinkunn á þessu ári. 

Nú er langur tími liðinn og engar fréttir héðan og eru á því ýmsar skýringar. Önnur skýringin er sú að ég er búin að vera erlendis í viku og hin er sú að það er búið að reynast mér erfitt að klára að skrifa um íþróttamót Harðar og Dreyra. Er búin að skrifa upp greinina aftur og aftur og hef ég ekki fengið mig til að láta frá mér það sem mig hefur langað til að láta flakka.

En ég kemst ekki hjá því  að segja að ég varð fyrir mjög miklum vonbrigðum með dómgæsluna á mótinu.  Við Kraflar tókum þátt í tveimur A úrslitum, tölt og fjórgang og enduðum í þriðja sæti í fjórgangi og fjórða sæti í tölti. Ég ætla ekki að reyna að raða í sæti í dag frekar en áður, enda sá ég bara hluta af öllu því sem fram fór. En ég get alveg tjáð mig um einkunnir sem voru gefnar á hrossinu sem ég var á og það sem ég sá, því að á  mótum er ekki bara verið að raða í sæti, heldur eigum við knapar að fá einkunnir sem við getum unnið með og haft til hliðsjónar. Við eigum að fá skýr skilaboð um hvað er gott og hvað má bæta.

Ég hef keppt á fimm íþróttamótum á Kraflari í ár og verið í stöðugum framförum, það veit ég, einkunnirnar sýna það og þeir sem hafa þekkingu og fylgst hafa með hafa séð það. Ég hef tekið mark á hverri einustu einkunn sem ég hef fengið, rætt við dómara og hestamenn  og fengið skýr skilaboð, sem ég hef fylgt og viti menn það hefur borið árangur, augljóslega .

Íþróttamót Sleipnis 4 gang 7, 23 og tölt 7,50 .

Íþróttamót Geysis 4 gang 7,57   og tölt  7,83

Heimsmeistaramóttsúrtaka 4 gang 7,47 og tölt 7,63

Gullmótið 4 gang 7,27

Íslandsmótið 4 gang 7,63 tölt 7, 83 býsna flott finnst mér.

 Íþróttamót Harðar og Dreyra og þá fær hann 7,13 í 4 gang og í fyrsta sinn er hann lægri í tölti ,7,07. Ekki bara það, heldur fékk hann einkunninina 6,7  í forkeppni 4 gangi hjá einum dómara sem fólst í því að hann gaf honum m.a 5,0 fyrir hægt tölt.Auðvitað hefði eitthvað getað farið úrskeiðis hjá okkur Kraflari, en nei það gerði það ekki,hann hefur aldrei verið betri að ríða inn á keppnisvellinum, hann var við taum takthreinn á réttum hraða og hágengur, það sáu allir sem vildu.

 En hver er ég sem segir það? ég hef unnið eingöngu við hesta og allt sem þeim viðkemur í 30 ár, já 30 ár hefur það verið mín vinna. Ég hef þjálfara, reiðkennara og dómara menntun, er mjög virkur og starfandi reiðkennari og hef verið landsliðsþjálfari Svía, normanna og Íslendinga oftar en einu sinni, ég veit hvað ég tala um.

Ég er ekki að rökræða hvort hann hefði átt að fá 8,0 eða 9,0, auðvitað getur ýmislegt spilað inn í, það veit ég vel, veður, vallaraðstæður, dagsformið og hinir hestarnir. Við erum að ræða um einkunnina 5,0, bara sí svona, ég spyr hvað gekk honum til? Síðan gaf hann honum einkunnina 6,5 fyrir hægt tölt í 4 gangs úrslitunum og hækkaði hann síðann upp í 7,0 í tölt úrslitunum. Til hvers? ekki var hann að skána.  Á íslandsmótinu fékk hann einnkunina 9,0 út  úr úrslitum í 4 gangi fyrir hægt tölt og hefur á öllum þeim íþróttamótum sem hann hefur tekið þátt í, í vor fengið milli 7,5 og 9,0 í forkeppni og í úrslitum  frá 8,0 til 9,5.  Hann  er með einkunnina 9,5 kynbótadóm oftar en einu sinni, þannig að íþrótta og kýnbótadómurum ber saman um að hann er með afburða hægt tölt.

 Það er leiðinlegt að skrifa þetta því þarna voru líka dómarar sem stóðu sig vel og er það ekki mín meining að kasta rýrð á þá, eða þeirra starf en það er ljóst að svona vinnubrögð hafa áhrif á fleiri en parið sem einkunnina hlýtur.  Maður verður bara svo svekktur þegar svona lagað gerist og þetta er bara eitt dæmi, en það hefði verið hægt að minnast á ýmislegt annað. Held að það sé löngu orðið timabært að  stokka upp í dómaramálunum, hugsa það öðruvisi og er ég með ýmsar hugmyndir sem vert er að skoða.  Þangað til verður maður bara að reyna að sniðganga ákveðna dómara, vegna þess að þegar hestum er gefið í sífellu rangar einkunnir, getur ekki verið lengur um mistök að ræða, heldur vanþekkingu eða í versta falli eitthvað persónulegt og það eru alls ekki allir sem eru tilbúnir til að leggja margra ára þjálfun undir svona vinnubrögð,  alla vega ekki ég.  

Svona í restina vil ég taka það fram að ég hef í stórum dráttum verið ánægð með dómgæsluna á öllum hinum mótunum sem ég hef tekið þátt í í sumar og  hef eins og ég minntist á hér áður getað unnið úr þeim og nýtt mér til framdráttar. Ég held líka að það sé mikilvægt að við látum vita þegar okkur finnist eitthvað klárlega rangt því dómarar þurfa líka aðhald og fræðslu eigi þeir að þróa sig, því við megum aldrei gleyma að dómarar eru og eiga að vera leiðandi í þróun reiðmennskunnar.